Saturday 04 de May de 2024

Comezan na Pobra os traballos de acondicionamento das cunetas


Un ano máis, a Concellaría dos Servizos Municipais da Pobra do Caramiñal conta coa Ecobrigada da Asociación Amicos para efectua-lo acondicionamento das cunetas das vías de titularidade municipal. Os traballos comezaron hoxe na zona do Conchido e estenderanse progresivamente a tódolos núcleos do termo municipal co obxectivo de contribuír a mellora-la visibilidade e a seguridade dos camiños.

Con relación a isto, a edil Estefanía Ramos (Nós Pobra) manifesta que as tarefas se inician sempre na primavera ao coincidir coa época de incremento da flora silvestre e, para a eliminación desta, o Concello conta novamente co referido equipo, reiterando así o seu apoio á inserción laboral de persoas con diversidade funcional.

A maiores, a Administración local asumiu a adecuación das marxes da estrada de titularidade autonómica AC-305 ao seu paso pola localidade. As persoas operarias da brigada municipal levan xa varios días retirando a vexetación co apoio de maquinaria.

E, nas inmediacións do parque do Castelo, procederase a partir do día 23 de marzo coa poda das árbores, especialmente daquelas cuxas ramas poidan afecta-lo estacionamento no carril de servizo da rúa Díaz de Rábago. Queda prohibido aparcar nesa área no transcurso destes labores.